Charla QUE NON TE LÍEN, TI ELIXES!

O pasado xoves 12 de novembro, o alumnado de 3º da ESO participou nunha nova sesión do programa «Que non te líen, ti elixes», desenvolvida na biblioteca do noso centro e organizada polo Departamento de Orientación.

Esta iniciativa da Xunta de Galicia busca favorecer unha orientación académica e profesional libre de estereotipos de xénero, axudando á mocidade a tomar decisións sobre o seu futuro sen deixarse condicionar por prexuízos ou ideas preconcebidas sobre as profesións.

A través de charlas didácticas e espazos de reflexión, o programa aborda a escasa presenza feminina en ámbitos profesionais tradicionalmente masculinizados, como a construción, a madeira, as TIC, o metal, a automoción ou o sector do mar. Tamén promove o coñecemento de referentes femininos nestes ámbitos e cuestiona os estereotipos que condicionan as eleccións profesionais.

Nesta ocasión contamos coa presenza de Irene González, team leader en NTT DATA, profesional do sector das Tecnoloxías da Información e a Comunicación (TIC), que compartiu a súa experiencia e achegou ao alumnado a realidade dun ámbito profesional con escasa representación masculina.

Unha oportunidade para descubrir novas posibilidades, ampliar horizontes e entender que as capacidades, os intereses e as motivacións persoais deben estar por riba de calquera prexuízo.

Porque non hai profesións de rapazas nin de rapaces. Hai profesións para quen queira escollelas!

Novembro, Mes da Ciencia en Galego nas Bibliotecas

Novembro é o Mes da Ciencia en Galego nas Bibliotecas, unha iniciativa que se celebra desde 2014 e que está vinculada ao Día Mundial da Ciencia para a Paz e o Desenvolvemento, que ten lugar cada 10 de novembro.

Esta conmemoración pretende espertar a curiosidade científica e reivindicar o galego como lingua válida para investigar, aprender, experimentar e divulgar coñecemento.

Desde os misterios do universo ata os segredos do fondo do mar, a ciencia tamén se pode descubrir na nosa lingua.

Na biblioteca do IES Marqués de Sargadelos atoparás unha selección de libros para explorar o fascinante mundo científico, descubrir novas ideas e alimentar a túa curiosidade.

Porque a ciencia tamén se le, se descobre e se comparte en galego.

Visita a Repsol

O martes 10 de novembro, o alumnado de 1º e 2º curso do Ciclo Superior de Química Industrial do IES Marqués de Sargadelos realizou unha visita ás instalacións de Repsol na Coruña.

Esta actividade permitiulles coñecer de primeira man o funcionamento dunha industria química de referencia, achegándose aos procesos industriais, ás instalacións e ás tecnoloxías empregadas no sector.

A visita constitúe unha excelente oportunidade para complementar os contidos traballados na aula, relacionar os coñecementos teóricos coa realidade profesional e descubrir as posibles saídas laborais vinculadas á Química Industrial.

Desde o IES Marqués de Sargadelos queremos agradecer a Repsol a súa acollida e a oportunidade de achegar o noso alumnado ao mundo da industria química.

Unha experiencia enriquecedora para seguir aprendendo e construíndo o seu futuro profesional!

Concurso de Tarxetas de Nadal

Chega o Concurso de Postais de Nadal ao IES Marqués de Sargadelos! 

O equipo de Biblioteca, xunto co Departamento de Debuxo e o EDLG, convídavos a participar no noso Concurso de Postais de Nadal. 

📌 Pode participar todo o alumnado da ESO.

📅 Data límite de entrega: 11 de decembro.

📍 Podes entregar o teu traballo na Biblioteca ou no Departamento de Debuxo.

🏆 Haberá premios para os 3 mellores traballos!

É hora de deixar voar a imaxinación, sacar a creatividade e encher o Nadal de arte! 

Anímate a participar! 

Visita aos Xulgados e ao Vello Cárcere de Lugo

O xoves 5 de novembro, o alumnado de 1º e 2º de Bacharelato realizou unha saída didáctica a Lugo para coñecer de primeira man diferentes institucións e espazos vinculados á xustiza e á historia. Ambas as actividades foron organizadas polo Departamento de Economía do IES Marqués de Sargadelos.

O alumnado de 2º de Bacharelato visitou os Xulgados de Lugo, onde tivo a oportunidade de achegarse ao funcionamento da Administración de Xustiza, coñecer a súa organización e comprender mellor o seu papel na sociedade. A visita permitiulles relacionar os contidos traballados na aula coa realidade das institucións xudiciais.

Pola súa banda, o alumnado de 1º de Bacharelato visitou o Vello Cárcere de Lugo, un edificio histórico rehabilitado como espazo cultural. Durante o percorrido, puido coñecer a historia deste antigo cárcere e achegarse á memoria das persoas que estiveron alí presas, así como a diferentes aspectos da historia contemporánea relacionados coa represión e a memoria histórica.

Esta saída didáctica permitiu complementar a formación académica do alumnado mediante experiencias directas fóra da aula, favorecendo a reflexión sobre a xustiza, os dereitos, as institucións e a memoria histórica.

Unha xornada de aprendizaxe que conectou os coñecementos académicos coa realidade social e histórica, enriquecendo a formación do noso alumnado.

Programa Zinkers Repsol

Un premio que recoñece o noso compromiso coa sustentabilidade!

O IES Marqués de Sargadelos recibiu  o xoves 5 de novembro o premio na categoría de Educación Secundaria dos Premios Zinkers, impulsados pola Fundación Repsol, un recoñecemento ao traballo realizado arredor da sustentabilidade e a transición ecolóxica.

A xornada comezou cunha visita á nave de Coleo, no polígono industrial da Laracha, onde coñecemos de primeira man o proceso de selección e clasificación da roupa destinada á reciclaxe. Unha experiencia para descubrir como os residuos téxtiles poden converterse en novos recursos e contribuír á economía circular.

A continuación, celebrouse o acto de entrega dos premios, conducido polo mago Jorge Luengo, que combinou a presentación do evento con sorprendentes e extraordinarios números de maxia, facendo da xornada unha experiencia aínda máis especial.

Durante o acto tamén tivemos a oportunidade de reflexionar sobre a sustentabilidade e a importancia de avanzar cara a modelos de produción e consumo máis responsables.

Parabéns tamén aos outros centros premiados: o CEIP Rosalía de Castro e o CIFP Someso, ambos da Coruña. 

Un recoñecemento que nos anima a seguir aprendendo, innovando e traballando por un futuro máis sostible! 

G.P.A.: monólogos en galego para a mocidade

Mentras se celebraba o magosto para o alumnado de 1º da ESO na tarde do luns 2 de novembro, os seus compañeiros e compañeiras de 2º e 3º da ESO gozaron de sendos monólogos do programa G.P.A. (Galego Para Adolescentes), protagonizados polo actor e contacontos Avelino González. A actividade foi organizada polo EDLG.

A través do humor, da narración e da interacción co público, Avelino González achegou o galego á realidade cotiá da mocidade, nunha proposta pensada para fomentar o uso da nosa lingua entre os adolescentes e mostrar que o galego tamén é unha lingua para rir, comunicarse, crear e gozar.

Unha xornada de outono, na que tradición, diversión e lingua galega se deron a man para celebrar a nosa cultura no instituto.