Fin de curso 2022/2023

O último día deste curso todo o alumnado do centro participou nunha pequena competición interna composta por diversos xogos: fútbol, vollei, corda, carreira de sacos, xogo dos panos etc. A nosa idea iniciar era trasladar os xogos á praia do Torno, mais as condicións meteorolóxicas impedíronnolo e finalmente celebramos a competencia nas instalacións do centro.

 

Os e as gañadores/as recibiron un pequeno premio moi doce.

Deixámosvos por aquí algunhas fotos.

Esperamos que pasedes bo verán! Esperámosvos aquí o curso próximo.

Curso de mergullo impartido por ABUGAL

O pasado luns 19 de xuño o alumnado de 3º de ESO tivo a oportunidade de iniciarse na práctica do mergullo da man da Asociación de Buceo de Galicia (ABUGAL). 

 

Ao longo da mañá realizáronse múltiples prácticas na piscina municipal e durante a tarde tivo lugar unha inmersión na praia da Caosa.

Desde o IES Marqués de Sargadelos agradecemos a ABUGAL esta marabillosa experiencia que agardamos repetir no futuro.

Queremos transmitir tamén o noso agradecemento ao Concello de Cervo por apoiar desde o primeiro momento esta iniciativa, financiando integramenteo seu custo e facilitando o acceso ás instalacións da piscina municipal e aos vestiarios da praia.

 

Cadros realizados polo alumnado de Debuxo artístico

O alumnado da materia de Debuxo Artístico realizou estes traballos que mostramos a continuación. Os cadros quedarán expostos permanentemente no centro.

Cadro elaborado por Clara, Helena, Karen e Irene (2º de BAC)

Cadro realizado por Keith (4º de ESO)

Cadro elaborado por Sofía, Blanca e Zeltia (2º de BAC)

Visita do alumnado do CEIP de Cervo e CEIP Península da Paz

O venres 16 de xuño tivemos a visita do alumnado dos colexios do noso concello que o ano que vén cursará 1º de ESO no centro.

Ao chegar tiveron unha pequena charla sobre o funcionamento do IES que se baseou nas principais diferenzas que existen entre o funcionamento dun centro de educación primaria e un de educación secundaria.

Posteriormente percorreron as instalacións do Marqués de Sargadelos e desfrutaron dun petisco na cafetería.

Antes de marchar tiveron tempo de compartir xogos cos compañeiros que este ano cursan xa 1º de ESO.

 

Xornadas de convivencia no albergue Casa Forte de Lusío

 O alumnado de 1° de ESO viaxou ata Samos para realizar unhas xornadas de convivencia.

 

Instaláronse no albergue Casa Forte de Lusío e alí participaron en diversas actividades como xincanas, escaperooms, xogos etc.

Á tarde realizaron unha visita guiada ao Mosteiro de Samos e fixeron noite no albergue.

 

A mañá seguinte percorreron un tramo do camiño de Santiago desde Pascai ata A Guiada.