Esta visita realizada tamén no mes de decembro á empresa Agroamb desenvolveuse dentro do programa Aulas de emprendemento.
O alumnado de FP, desde o grao básico ata ao superior, viaxou a Ponte de Outeiro para visitar dita empresa e coñecer de primeira man o seu traballo.
En agroamb dedícanse á valorización de residuos orgánicos do tecido industrial galego para o sector agrícola. En resumo, o seu traballo é converter certos residuos en recursos.
O pasado 12 de decembro recibimos a visita de Andrea González Río, emprendedora mariñá, que veu falarnos da súa experiencia dentro das charlas que se desenvolveron grazas ao programa Aulas de Emprendemento.
Obradoiros realizados o pasado trimestre por @pildorasdigitales.es para a formación de Aulas de Emprendemento.
"A torre máis alta do mundo", "A Jenga", " Dinámicas para traballar a persistencia, a frustración e a actitude" e por último un "Escape Room de habilidades".
O alumnado traballou habilidades como a empatía, o traballo en equipo, a capacidade de reacción, a priorización de criterios etc.
A semana pasada tivo lugar a segunda viaxe dentro de "Aulas de Emprendemento" do IES Marqués de Sargadelos.
O alumnado e profesorado do Ciclo Superior en Química Industrial desprazouse ata as instalacións da refinería que Repsol ten na Coruña e na cal o noso alumnado ten a posibilidade de realizar a "Formación en Centros de Traballo" e desde este ano tamén a formación dual intensiva no 2º curso. Alí ademais de ensinarnos as súas instalacións faláronnos da historia da refinería, as súas adaptacións para ser máis sostibles e a gran importancia das chamadas habilidades brandas ou "soft skills" á hora de traballar, xa sexa por conta allea ou á hora de emprender un negocio propio.
Posteriormente, na rúa Alfredo Vicenti, ao carón da praia de Riazor, o xerente de “Pencil&Fork” @pencilandfork_galicia falounos da súa experiencia emprendedora coa que quedamos marabillados. David é licenciado en Química e despois de estar traballando en importantes posicións en universidade e empresa tanto en Cataluña como en Chicago e Londres, foi nesta última cidade onde decidiu emprender o seu propio negocio. Tras a pandemia el e a súa parella decidiron voltar a Galicia e adaptar o negocio londinense á cidade da Coruña. Ambos destacan a importancia de adaptarse ao cliente, algo que vai cambiando co tempo, así como ter confianza e paciencia, o uso de novas tecnoloxías e o saber idiomas para captar clientes de outros países, no seu caso moitos cruceiristas que están de paso na cidade.
Primeiro día de visitas dentro do programa de Aulas de emprendemento na Formación Profesional.
Este mércores o alumnado de FP do IES marqués de Sargadelos visitou Insertega en Arteixo Insertga S.L., unha empresa pioneira na xestión de residuo téxtil e economía circular. O xerente, Juan Meijide, falounos das orixes da súa idea e como foi evolucionando ata o día de hoxe. Así tamén coñecemos a súa filial Equore que produce revestimentos a partir de residuos téxtiles, evitando que acaben incinerados ou en vertedoiros.
Despois da primeira visita desprazámonos ata o porto de Santa Cruz en Oleiros. Alí ,Marta Galán, fundadora de Cervexas artesanas Port Alé falounos entre outras cousas sobre a súa inquietude emprendedora dende que era moi nova, as dificultades atopadas nas diferentes fases dos seus proxectos empresariais e o que considera fundamental á hora de crear unha empresa: formación, planificación, relacións e actitude.
Terminada a charla de emprendemento comemos nas súas instalacións de Porto Alé.
