ACTIVIDADES COMPLEMENTARIAS E EXTRAESCOLARES: 25N

25/11/25

25N na biblioteca

📚💜 25N na biblioteca do centro 💜📚

Este ano conmemoramos o Día Internacional da Eliminación da Violencia contra as Mulleres cun espazo moi especial: o noso punto violeta, onde presentamos unha selección de libros para pensar, sentir e tomar conciencia.

✨ “Que o único que che roube o alento sexa un libro” é o lema que guía esta iniciativa.

Ao longo da biblioteca tamén agardan citas repartidas polas mesas e estanterías, pequenas pinceladas de reflexión para acompañar as lecturas, xunto cunha exposición de carteis elaborados polo alumnado, que enchen o espazo de creatividade, sensibilidade e compromiso.

A lectura é unha das mellores ferramentas para construír igualdade. Sigamos lendo, aprendendo e avanzando xuntas e xuntos. 💜📖

18/11/25

25N

No noso centro educativo sumámonos un ano máis á conmemoración do 25N, unha data para reflexionar, tomar conciencia e manifestar con claridade que ningunha forma de violencia contra as mulleres é aceptable nin pode quedar invisibilizada.

Co obxectivo de sensibilizar a toda a comunidade educativa, durante os dous recreos deste 25 de novembro proxectaranse curtametraxes e pezas musicais que convidan á reflexión, ao respecto e á igualdade. Estas creacións artísticas axudaranos a comprender mellor as consecuencias da violencia machista e a importancia de implicarnos activamente na súa erradicación.

Animamos a todo o alumnado a participar, escoitar, mirar con atención e compartir impresións. A igualdade constrúese cada día, e cada xesto, palabra ou toma de conciencia contribúe a crear un espazo máis seguro, libre e respectuoso para todas as persoas.

O 25N lembramos, denunciamos e actuamos. Xuntas e xuntos, conta a violencia de xénero.

02/12/24

Representación de "Invisible"

Con motivo da conmemoración do 25 N, Día da Eliminación da Violencia contra a Muller o alumnado de Oratoria de 3º de ESO realizou unha representación na Biblioteca do centro baseada na obra Invisible de Aizpea Goenaga.

O contexto é o seguinte: unha muller acaba de ser maltratada fisicamente polo seu marido. Na obra interveñen varias voces como a nai que insiste en que volva coa parella ou unha amiga, que lle dá ánimos para que continúe coa denuncia.

Deixámosvos aquí a obra completa:

26/11/24

Programa "Que non te líen, ti elixes"

Un estereotipo de xénero é unha visión xeneralizada ou unha idea preconcibida sobre os atributos ou as características, ou os papeis que posúen ou deberían posuír ou desempeñar as mulleres ou os homes.

Ante a necesidade de abordar unha educación sen estereotipos de xénero, a Dirección Xeral de Ordenación e Innovación Educativa da Consellería de Cultura, Educación, Formación Profesional e Universidades e a Dirección Xeral de Relacións Laborais da Consellería de Promoción do Emprego e Igualdade da Xunta de Galicia crearon o programa formativo "Que non te líen, ti elixes" para o alumnado de 4° e 3° de ESO.

Este programa ten como obxectivo principal favorecer a orientación vocacional libre de estereotipos na elección de itinerarios formativos enfocados nos ciclos de FP con menor presenza de mulleres.

25/11/24

25 N Día da Eliminación da Violencia contra as mulleres

Os alumnos e alumnas de Educación Plástica de 4º ESO abordaron esta temática e elaboraron uns carteis valéndose dunha aplicación de fotografía, o resultado son uns impactantes pósters que nos invitan a tomar conciencia desta lacra social que padecemos. Expoñémolos no taboleiro da entrada xunto con algunhas publicacións que tratan sobre diversos temas como, a igualdade, as relacións de parella, o papel da muller noutras épocas, o feminismo ou mulleres destacadas en distintos ámbitos e que serven de referente as xeracións vindeiras.