Amosando publicacións coa etiqueta 3º ESO. Amosar todas as publicacións
Amosando publicacións coa etiqueta 3º ESO. Amosar todas as publicacións

12/11/26

Charla QUE NON TE LÍEN, TI ELIXES!

O pasado xoves 12 de novembro, o alumnado de 3º da ESO participou nunha nova sesión do programa «Que non te líen, ti elixes», desenvolvida na biblioteca do noso centro e organizada polo Departamento de Orientación.

Esta iniciativa da Xunta de Galicia busca favorecer unha orientación académica e profesional libre de estereotipos de xénero, axudando á mocidade a tomar decisións sobre o seu futuro sen deixarse condicionar por prexuízos ou ideas preconcebidas sobre as profesións.

A través de charlas didácticas e espazos de reflexión, o programa aborda a escasa presenza feminina en ámbitos profesionais tradicionalmente masculinizados, como a construción, a madeira, as TIC, o metal, a automoción ou o sector do mar. Tamén promove o coñecemento de referentes femininos nestes ámbitos e cuestiona os estereotipos que condicionan as eleccións profesionais.

Nesta ocasión contamos coa presenza de Irene González, team leader en NTT DATA, profesional do sector das Tecnoloxías da Información e a Comunicación (TIC), que compartiu a súa experiencia e achegou ao alumnado a realidade dun ámbito profesional con escasa representación masculina.

Unha oportunidade para descubrir novas posibilidades, ampliar horizontes e entender que as capacidades, os intereses e as motivacións persoais deben estar por riba de calquera prexuízo.

Porque non hai profesións de rapazas nin de rapaces. Hai profesións para quen queira escollelas!



03/11/26

G.P.A.: monólogos en galego para a mocidade

Mentras se celebraba o magosto para o alumnado de 1º da ESO na tarde do luns 2 de novembro, os seus compañeiros e compañeiras de 2º e 3º da ESO gozaron de sendos monólogos do programa G.P.A. (Galego Para Adolescentes), protagonizados polo actor e contacontos Avelino González. A actividade foi organizada polo EDLG.

A través do humor, da narración e da interacción co público, Avelino González achegou o galego á realidade cotiá da mocidade, nunha proposta pensada para fomentar o uso da nosa lingua entre os adolescentes e mostrar que o galego tamén é unha lingua para rir, comunicarse, crear e gozar.

Unha xornada de outono, na que tradición, diversión e lingua galega se deron a man para celebrar a nosa cultura no instituto.


13/10/26

Corresponsables 3º ESO

🟣 Educando en igualdade, construíndo relacións saudables! 🤝

O pasado venres, 9 de outubro, o alumnado de 3º da ESO participou, na hora de titoría, nun obradoiro do Programa Corresponsables do Concello de Cervo, enmarcado no proxecto «Comunidade consciente: igualdade, masculinidade e corresponsabilidade».

💬 A través de dinámicas participativas e espazos de reflexión, abordáronse a construción da identidade na adolescencia, a presión social e a influencia das redes sociais nos modelos de masculinidade.

💜 Unha oportunidade para fomentar o autocoñecemento, a empatía, a xestión emocional e a corresponsabilidade, promovendo relacións máis igualitarias, saudables e respectuosas.

Porque educar en igualdade é construír unha comunidade máis consciente e cohesionada! 🌱


01/10/26

Charla DOWN Lugo

 

Unha achega á inclusión e á diversidade

O pasado mércores 30 de setembro, o alumnado de 3º da ESO participou na biblioteca do centro nunha charla impartida pola Asociación Down Lugo, nun encontro pensado para achegar ao alumnado á realidade das persoas con síndrome de Down e favorecer a reflexión sobre a diversidade.

Ao longo da sesión abordáronse cuestións relacionadas coa inclusión, a igualdade de oportunidades, a autonomía persoal e a participación na sociedade, ofrecendo ao alumnado a oportunidade de coñecer diferentes experiencias e de compartir dúbidas e reflexións nun ambiente próximo e participativo.

A charla permitiu poñer en valor a importancia de coñecer e respectar as diferenzas individuais, así como de identificar e superar os prexuízos e as barreiras que poden dificultar a plena participación de todas as persoas na sociedade.

Unha actividade para aprender, reflexionar e seguir construíndo espazos educativos baseados no respecto, na convivencia e na inclusión.



19/06/26

Videoclip STROMAE de TOUS LES MEMES

Durante estes últimos días de curso, as alumnas de 3º de Francés aprenderon a letra, os bailes e prepararon esta versión do mítico videoclip Tous les mêmes de Stromae, que vos deixamos aquí.

Detrás deste traballo hai moitas horas de ensaio, creatividade, esforzo e ilusión, e o resultado non podería ser máis especial.

Xiana quere agradecer especialmente a este grupo a súa paciencia, motivación e implicación ao longo destes meses. Tamén ao alumnado de diferentes cursos que colaborou na elaboración de parte do decorado e axudou a facer posible este proxecto.

Merci beaucop à toutes et à tous pour votre travail et votre enthousiasme!

Prenez bien soin de vous, bonnes vacances e bonne vie!

26/05/26

O PRACER DE LER, de Andrea Maceiras

Desde o equipo de Biblioteca e o EDLG do IES Marqués de Sargadelos queremos recomendar unha lectura moi especial: O pracer de ler, da escritora galega Andrea Maceiras.

Andrea Maceiras é unha das voces máis destacadas da literatura xuvenil galega actual. Nas súas obras aborda temas moi próximos á adolescencia, como a identidade, as emocións, as relacións persoais ou a importancia de atopar o propio lugar no mundo. En O pracer de ler, a autora reflexiona sobre o valor da lectura e sobre como os libros poden axudarnos a comprender mellor a realidade, acompañarnos nos momentos difíciles e abrirnos novas maneiras de pensar e sentir.

Trátase dunha lectura amena, sensible e moi próxima ao alumnado da ESO, ideal para descubrir que ler no é só unha actividade escolar, senón tamén unha fonte de emoción, aventura e crecemento persoal.

Un libro moi recomendable para seguir fomentando o gusto pola lectura en galego.

Achégate ao recuncho da biblioteca e bótalle un ollo!

14/05/26

Charla MENORES NIN UNHA GOTA

O mércores 13 de maio, o alumnado de 2º e 3º da ESO asistiu a dúas charlas do programa Menores nin unha gota, impulsado pola Fundación Alcohol y Sociedad.
Nestas sesións abordouse a importancia de previr o consumo de alcohol en menores, analizando os seus efectos para a saúde, especialmente no cerebro en desenvolvemento, así como os riscos asociados a condutas pouco seguras.
Tamén se traballaron estratexias para tomar decisións responsables, resistir á presión do grupo e fomentar hábitos de vida saudables.
Unha iniciativa clave para sensibilizar e acompañar á nosa mocidade no camiño cara un estilo de vida máis consciente e saudable.




13/05/26

DOMUS e CASA DAS CIENCIAS

O martes 12 de maio o alumnado de 1º e 3º da ESO puxo rumbo a A Coruña para vivir unha xornada chea de ciencia, tecnoloxía de descubrimentos.
Pola mañá desfrutaron dunha proxección e dunha visita á Domus, explorando o fascinante mundo do ser humano e da ciencia interactiva. Pola tarde continuou a aventura na Casa das Ciencias e no seu planetario, viaxando entre estrelas e galaxias.
Un día diferente para aprender, experimentar e compartir grandes momentos!
Actividade organizada polos departamentos de Tecnoloxía e Bioloxía.








22/04/26

Charla ADICIÓNS DIXITAIS E APOSTAS ONLINE (Garda Civil)

O mércores 22 de abril, o alumnado de 3º e 4º da ESO do noso centro participou nunha charla impartida pola Garda Civil dentro do Plan Director para a Convivencia e a Mellora da Seguridade nos Centros Educativos.

Durante a sesión abordáronse temas de gran relevancia para a mocidade, como a prevención de apostas online e as adicións dixitais, así como fomentar o uso responsable das tecnoloxías.

Grazas á Garda Civil pola súa colaboración.




Teatro "EL PERSA" de Plauto en Xixón

 O martes 21 de abril, o teatro clásico cobrou vida en Xixón!

O alumnado de 3º e 4º da ESO do IES Marqués de Sargadelos tivo a oportunidade de asistir á representación de "El Persa" de Plauto, dentro do Festival Xuvenil de Teatro Grecolatino de Xixón.

Unha comedia chea de enredos, humor e personaces inesquecibles  que nos permitiu achegarnos ao mundo da Antiga Roma e comprobar como, a través do enxeño e dos enganos, estas historias seguen a estar moi vivas na actualidade.

Actividade organizada polos Departamentos de Lingua Castelá e Latín.


06/03/26

Carteis do 8M


No noso IES seguimos creando e reivindicando!

O departamento de Educación Plástica e Visual organizou co alumnado de 3º e 4º da ESO a elaboración de carteis con motivo do Día Internacional da Muller. A través de fotografías das propias alumnas e empregando programas de edición fotográfica, deron forma a propostas cheas de creatividade, reflexión e compromiso.

Un traballo que combina arte, tecnoloxía e igualdade para visibilizar a importancia desta data tan significativa como é o 8M.

02/02/26

XXIV SEMANA BRANCA EN ANDORRA

Parte do noso alumnado de 3º e 4º da ESO e 1º de bacharelato gozou na última semana de xaneiro dunha inesquecible Semana Branca en Andorra, combinando deporte, aprendizaxe e convivencia. Esta foi a vixésimo cuarta edición

Unha experiencia única para esquiar, compartir momentos e crear lembranzas, organizada polo departamento de Educación Física, fomentando hábitos saudables e compañeirismo fóra da aula.





26/01/26

CONTACONTOS bilingüe en galego/inglés

Na biblioteca do noso IES vivimos unhas sesións moi especiais: contacontos bilingüe en galego e inglés dirixido ao alumnado de 2º e 3º da ESO. Foi organizado polo Departamento de Inglés.

Da man de Charo Pita e Sofia Maul (nativa de lingua inglesa), as historias foron fluíndo entre dúas linguas, enchendo o espazo de imaxinación, curiosidade e moitas ganas de escoitar. Unha experiencia que demostra que os contos non entenden de fronteiras e que aprender linguas tamén pode ser pura maxia.

Grazas por esta viaxe chea de palabras, voces e emocións.




03/12/25

Charla TI ELIXES

O mércores 3 de decembro, o alumnado de 3º ESO tivo unha charla sobre orientación vocacional.
O programa"Que non te líen, ti elixes" é unha iniciativa conxunta da Consellería de Educación, Ciencia, Universidades e Formación Profesional e da Consellería de Emprego, Comercio e Emigración a través da cal se busca fomentar, desde as aulas, unha orientación profesional libre de estereotipos de xénero así como a igualdade de oportunidades entre homes e mulleres e o fomento da coeducación.
A finalidade deste programa é seguir avanzando na presenza de mulleres en sectores tradicionalmente masculinizados como o forestal, a construción, o marítimo-pesqueiro, o do metal ou as TIC. Como novidade nesta edición, introducíronse nesta iniciativa contidos relacionados coa presenza de homes en profesións consideradas tradicionalmente feminizadas, co obxectivo de romper cos prexuízos ou estereotipos de xénero nas diferentes profesións.
Grazas a  Iris e Arantxa, dúas mulleres traballadoras do sector do mar, por dar exemplo e facer pensar á xuventude dos estereotipos de xénero nas profesións.


24/11/25

Talleres Educación afectivo-sexual

 Hoxe estivo no noso centro María González Cociña, matrona e directora do Centro M (Burela), para impartir dous talleres de educación sexual adaptados á etapa da adolescencia. 

Comezou co alumnado de 1º e 2º ESO, con "Coñecendo o meu corpo". Este taller aborda os cambios físicos e emocionais que experimentan os rapaces e rapazas na pubertade, enfocado para promover a igualdade, a empatía e o respecto cara os compañeiros e compañeiros. Explicouse a función reproductiva de ambos e profundizamos no ciclo menstrual. Tamén se achegaron produtos de hixiene menstrual para familiarizarse con eles. 

Despois, impartiu o taller "Sexualidade responsable" co alumnado de 2º e 4º da ESO. Nel deu información clara e adaptada sobre relacións sexuais, ITS e anticoncepción, fomentando o autocoñecemento, a relación positiva coa propia sexualidade, a toma de decisións responsables e o respecto interpersoal.

Estes talleres foron moi enriquecedores e contribúen á educación integral do noso alumnado.







20/11/25

Charla INICIACIÓN SEGURA Á PEGADA DIXITAL

Hoxe visitounos David, da Axencia para a Modernización Tecnolóxica de Galicia (AMTEGA) para realizar co alumnado de 3° da ESO un taller co obxectivo  de sensibilizar sobre o uso responsable de Internet e redes sociais, así como da importancia de manter unha pegada dixital segura e positiva.

O contido deste taller centrouse en:

- Comprender que é a pegada dixital e como se forma.

- Identificar risco asociados á sobreexposición de datos persoais.

- Aprender a configurar a seguridade e privacidade nas redes sociais como WhatsApp, Instagram, TikTok, BeReal,..

- Fomentar prácticas seguras e responsables do uso das TIC.

Agardamos que esta charla nos axude a navegar en rede con máis criterio, seguridade e responsabilidade.






11/11/25

Charlas FUNDACIÓN ALAR GALICIA

A fundación Alar Galicia traballa na comunidade galega desde 2001 cos colectivos e persoas máis desfavorecidas. Actualmente faino en todo o territorio galego cos colectivos prioritarios de mulleres e menores, desde diferentes ámbitos, como a prevención e sensibilización de condutas autolíticas e suicidas, a prevención da violencia de xénero e da filioparental, entre outros programas. 

Hoxe, martes 11 de novembro, visitaron o noso centro Lorena e Tania para dar dúas charlas ao noso alumnado. Na primeira, co alumnado de 3º da ESO, traballaron a "Influencia das novas tecnoloxías na conduta suicida". Na segunda, falaron da "Violencia machista e saúde mental na xuventude" co alumnado de 4º ESO.